Меню Сайта
Онлайн Мини Чат
Статистика сайта
Онлайн всего: 96
Гостей: 95
Пользователей: 1
Nelufar
Фотогалерея
Главная » Foydali maslaxatlar » ​Gormonlar «qo`zg`oloni»ning 10 belgisi
10:20
​Gormonlar «qo`zg`oloni»ning 10 belgisi
Mavsum almashinuvi kutilmagan o`zgarishlarni ham sabab bo`ladi. Ba`zan o`z-o`zidan yig`lagimiz kelsa, ba`zida hissiyotlarimizni anglay olmaymiz. Eng qiyini, bu holat bilan mustaqil kurashishni ham eplolmaymiz. Bunday paytda har qancha «O`zingni qo`lga ol», deya takrorlamaylik kor qilmaydi. Demak, o`zimizni ayblashga hojat yo`q. Zero muammo tor fe`limizda emas, bizni boshqarayotgan gormonlarda! Ular o`yin ko`rsata boshlasa, yaxshilab davolanib olmaguningizcha, halovat topmaysiz. Aksariyati insonning yashash tarziga bog`liq. E`tiboringizga havola etilayotgan ma`lumotlarga diqqat qarating, quyidagi 10 belgi sizda kuzatilsa, davo choralarini kechiktirmang. Mutaxassis shifokor-terapevt Shahnoza SAIDOVA.

1. «Asabimga tegmang, odamlar!»

Keyingi paytlarda hamma narsa asabingizga tegadigan bo`lib qolgan. Bir gap ko`p, yarimtasi oz, deganlaridek, arzimagan gapdan ta`sirlanib yig`lab oladigan odat chiqargansiz. Asablaringiz tarang tortilgan ipga o`xshaydi, go`yo hozir uzilib ketadigandek. Uyda bolalarning xarxashasiga 5 daqiqadan ortiq chidolmaysiz, ishda hamkasblarning jaranglagan kulgusidan jazavangiz qo`ziydi, tunda qo`shnilarning taqir-tuquridan uyqu yo`q. Ko`z ochib ko`rgan juftingizning xurragi shu kunlarda umuman yoqmayapti. Hamma gap gormonlarda!

2. Beqarorlik ayolga xos?!

Kayfiyatingiz soat mili bir daqiqa aylanib ulgurmay o`zgarishiga nima deysiz? Qoyil-e, shu bugunning o`zida uydagilarning ko`ziga ming xil qiyofada ko`rindingiz – bir qarasa, mungli farishta, bir qarasa, pixini yorgan ayyor… Tavba, ayolning makri deb shunga aytishsa kerak-da? Aslida sizning zarracha aybingiz yo`q, bu gormonlarning ishi...

3. Suv ichsangiz ham semirasiz

Non, kartoshka, shirinlik emagangizga yildan oshdi, ammo ozish haligacha orzu bo`lsa, nailoj. Har kuni saharlab yugurish, fitnes ham yordam bermayapti, deng. Axir bu gormonlar o`yini-da! Ularni tinchlantirmaguncha ozolmaysiz.

4. «Tuklardan bezorman»

Keyingi paytlarda ko`krak, iyak va lab ustidagi tuklar ko`paygandek. Ularni qancha terib depilyasiya qilmang, darrov yana paydo bo`lmoqda. Ishqilib, asabiylashish uchun yana bir sabab bor.

5. «Faqat bugunmas, adasi»

Bu ayolga nima bo`lgan o`zi? Eringiz kayfiyatingizga moslasholmay halak. Bugun tashabbus o`zingizdan chiqib, tuni bilan ko`nglini ovlaysiz. Ertasiga esa to`shakdagi sovuqqon muomalangizdan erning ko`ngli muzlaydi. Nima ham derdik, eringizga to`zim bersin. Ammo gormonlarga tahlil topshirmasangiz, ahvolim tang deyavering.

6. Husnbuzarlar ham jim turmaydi

18 yoshini qo`msaganlar diqqatiga: qaytgan narsani chorlamang, yo`qsa yana o`smirlik davridek husnbuzar toshadi, ishonavering. Ularning og`riqli ekanini-chi, skrab, surtma dori hech narsa yordam bermaydi-ya… Bu ham gormondan deysizmi, xuddi o`zi!

7. Teri qichishi

Negadir teringiz qichishadigan bo`lib qolgan. Ayniqsa, qo`l tegishi qiyin bo`lgan sohalar – elka, umurtqa sohasi, qo`llarning o`ziyoq tinimsiz qichishadi, xullas, pul kelishiga emasligi aniq.

8. Terlashga qarshi nima bor?

Sotuvchi maqtab sotgan terga qarshi vosita yordam bermay qo`ydimi? Ayb mahsulotning sifatida emas, tinchlaning. Ko`p terlash gormonlar junbushga kelganini ham bildiradi.

9. «Oy ko`rishim o`zgargan»

Hayzingiz vaqtida kelmasligi odatga aylandimi? Goh muddatidan oldin, gohida umuman kelmasligi mumkinmi? Darrov shifokorga! Bu bilan hazillashib bo`lmaydi.

10. «Uyquda halovat yo`q»

Ovqatdan keyin darrov yostiq o`ziga chorlaydi. Lekin yarim tunda uyg`onib qilinmagan ishlarni eslaysizmi-ey, ana undan keyin ertalabgacha uyqu yo`q. «Qush uyqu»dan keyin ishga borishni ayting, uzukkun bosh og`rib charchoq qiynaydi.

Shoshilamiz!

Yuqorida gormonal buzilishning 10 belgisini ta`rifladik. Agar sizda bularning atigi 5 tasi kuzatilsa, uchta shifokor ko`rigi sizga muntazir. Terapevt, endokrinolog va ginekolog ko`rigida o`zingizda bo`layotgan o`zgarishlarni oqizmay-tomizmay boricha ayting, muammoning asl sababini aniqlash uchun bu zarur. Davolanishga jiddiy kirishsangiz, tez orada hammasi joyiga tushganini ko`rib, bizga albatta, rahmat aytasiz.
Категория: Foydali maslaxatlar | Просмотров: 199 | Добавил: ADMIN | Рейтинг: 0.0/0
Всего комментариев: 0
avatar
CHAQMOQ.COM © 2016-2017 | Statok.net waplog Яндекс.Метрика