Логин:
Пароль:
Главная » Mahalliy
04:59
Mirziyoyev 11 yillik ta'limni qayta tiklashni taklif etdi

Shavkat Mirziyoyev Toshkent shahrining Uchtepa tumanidagi 78-umumta`lim maktabini borib ko'rdi.

Uchtepa tumanidagi 78-maktab 1967 yilda qurilgan. Maktabni qayta ta`mirlash, moddiy-texnik bazasini mustahkamlash rejalashtirilmoqda.

Prezident maktab bilan kollejlar o'rtasidagi bog'liqlikni mustahkamlash, xususan, ushbu maktabda tajriba sifatida 11 yillik ta`limni qayta tiklash, uning qoshida o'quv-kasb korxonasi tashkil etish zarurligini ta`kidladi.

«Yuqori sinflarda bolalar shaxs bo'lib, jamoa bo'lib shakllanadi. Ayni o'sha paytda ularni o'zlari o'rgangan muhitdan ajratib qo'ymaslik kerak. Bu yoshlarning ruhiyatiga, davomatiga, oxir-oqibatda ta`lim-tarbiyasiga salbiy ta`sir qilishi mumkin. Shu bois ta`lim jarayonining uzluksizligini ta`minlash, o'quv dasturlarini takomillashtirish zarur», — degan Prezident.

Shavkat Mirziyoyev 15 iyun kuni Toshkentda bo'lib o'tgan «Ijtimoiy barqarorlikni ta`minlash, muqaddas dinimizning sofligini asrash — davr talabi» mavzusidagi anjumanda so'zlagan nutqida yosh avlod tarbiyasi haqida alohida to'xtalib o'tgandi.

«Bizni hamisha o'ylantirib keladigan yana bir muhim masala – bu yoshlarimizning odob-axloqi, yurish-turishi, bir so'z bilan aytganda, dunyoqarashi bilan bog'liq. Bugun zamon shiddat bilan o'zgaryapti. Bu o'zgarishlarni hammadan ham ko'proq his etadigan kim – yoshlar. Mayli, yoshlar o'z davrining talablari bilan uyg'un bo'lsin. Lekin ayni paytda o'zligini ham unutmasin. Biz kimmiz, qanday ulug' zotlarning avlodimiz, degan da`vat ularning qalbida doimo aks-sado berib, o'zligiga sodiq qolishga undab tursin. Bunga nimaning hisobidan erishamiz? Tarbiya, tarbiya va faqat tarbiya hisobidan», deya prezidentning so'zlarini keltirgan O'zA.

Bu vazifalar maktab, oila, mahalla, butun jamoatchilikka katta mas`uliyat yuklashi,
mamlakatda ta`lim-tarbiya sohasining barcha bo'g'inlari – maktabgacha ta`lim, maktab, o'rta maxsus va oliy ta`lim tizimini takomillashtirish, yangi muassasalar bunyod etish va mavjudlarini qayta ta`mirlash bo'yicha olib borilayotgan ishlar yoshlar kamolotida o'z samarasini berishi ta`kidlangan.

Shu yerda 1-sinf o'quvchilariga beriladigan «Prezident sovg'asi» komplekti, maktab o'quvchilariga mo'ljallangan badiiy adabiyotlar, xalq ta`limi muassasalarini yangi o'quv yiliga tayyorlash rejasi namoyish etilgan.
Категория: Mahalliy | Просмотров: 1096 | Добавил: MASSARI | Теги: 11 yillik maktab, ta'lim, Shavkat Mirziyoyev | Рейтинг: 0.0/0
Всего комментариев: 0
avatar
Statok.net
waplog
Яндекс.Метрика

CHAQMOQ.COM © 2016-2017. Использовании дизайн u-torrentino

POWERED BY MASSARI.