Меню Сайта
Онлайн Мини Чат
Статистика сайта
Онлайн всего: 26
Гостей: 26
Пользователей: 0
Фотогалерея
Главная » 2016 » Dekabr » 7 » Siz — yagona va betakrorsiz! Bunga ishonsangiz, bas!
21:46
Siz — yagona va betakrorsiz! Bunga ishonsangiz, bas!
Zavqqa to`la baxtli hayot kechirishni istasangiz, birinchi galda, o`zingizga bo`lgan ishonch hissini mustahkamlang. Buning uddasidan chiqish oson emas — muammo va mushkulotlar bo`lishi tabiiy, albatta. Ammo hayot yanada yorqinroq mazmun kasb etishi uchun kelajak sari dadil odimlash kerak!



Jur`atsizlikni engish lozim

Biz, odamlar ajoyibmiz. Ishxonadagi hamkasblarni kuzatib, ba`zan hayron qoladi, kishi. Ayrimlar bor, salohiyati, tajribasi va bilimi jihatidan ko`pchilikdan ustun tursa-da, ular faqat belgilangan ishnigina bajarib, pana-pastqamda o`tiradigan, ko`pchilikda qiziqish uyg`otmaydigan shaxslar hisoblanadi. Bunday xodimlarga rahbariyat ham ko`p yumushlarni ishonib topshirmaydi. Negaki, o`ziga past baho beradigan odamga boshqalar ham ishonch bildirmaydi. Yana shunday hamkasblarimiz borki, ular imijdan tortib, odamlar bilan muomalagacha — bari-barini qoyillatib qo`yadi, hayiqmay katta-katta ishlarni o`z zimmasiga oladi. O`sha ishni bajargunicha ko`plarni xunob qilsa-da, natijayu mukofot faqat uning nomiga yoziladi, qarsaklar ham uning sharafiga chalinadi. Shundan kelib chiqib aytish mumkinki, o`ziga ishonmaslikning birinchi belgisi omadsizlikdir.

Ba`zan esa do`stlarga yoqmay qolishdan qo`rqib, o`z fikrini aytmay, boshqalarnikini ma`qullayverish ko`pchilikning ixlosi qolishiga sabab bo`lishi ham mumkin. Jamoada, majlisda diqqat-e`tiborga tushishdan uyalish, do`konda o`z huquqini talab qilishdan xijolat tortish, himoyaga muhtoj va haq odamni himoya qilishga jur`at topa olmaslik, oila buzilishiga sabab bo`layotgan kamchiliklar xususida lom-mim deyolmaslik... Bunday paytlarda uyalish, tortinish tufayli kishi o`zining tep-tekis hayotini o`nqir-cho`nqirga aylantirib yuborishi, omadi kulib turgan joyda og`zidagi oshni oldirib qo`yishi hech gap emas.

Manfaatdorlik kimga ham yoqmaydi, deysiz?!

Bir o`ylab ko`ring-a, nega hamma hayotda omadli, baxtli yashashni istaydi, o`zidagi kamchiliklarni barataraf etishni chin dildan xohlaydi, ayniqsa, o`zini sevish va qadrini baland bilishga harakat qiladi-yu, lekin jamiyatda zaif va qo`rqoq odamlar kamaymaydi?

Ruhshunoslarning fikricha, agar odamning biror muammosi bo`lsa (masalan, o`ziga nisbatan ishonchsizlik)yu uni hal etishga harakat qilmasa, demak, u shundan manfaatdor. Nega deysizmi? Hozir tushuntiramiz: uyatchanlik, passivlik, beqarorlik, ko`nuvchanlik, yaxshi ish, oylik topolmaslik, o`z huquqini talab qilolmaslik — muammolarga echim topmaslik uchun yaxshi bahona va bundaylar mas`uliyatni boshqalarning zimmasiga yuklab, o`zi uchun boshqalarni vasiy qilib oladi va xotirjam yashayveradi. Siz shundaylardan bo`lishni istamasangiz, kamchiliklaringizdan, aniqrog`i, o`zingizdan qoniqmaslik hissidan forig` bo`lishga harakat qiling!



O`zingizga nisbatan haddan ziyod talabchansiz...

O`ziga nisbatan talabchanlik haddan ortganida kishi o`zini baxtsiz his qila boshlaydi. Shuning uchun zimmangizdagi zalvorni kamaytiring. Reja bo`yicha ish tutib, muhim yumushlarni o`z vaqtida uddalashga harakat qiling. Zero, hech nima qilmagandan ko`ra, nimanidir bajargan ma`qul. Ba`zan, xato qilish, adashishga ham o`zingizni ko`ndiring. Bu keyinchalik kichik muammolarni hal qilib, katta marralar sari yo`l olishingizda muhim asos vazifasini o`taydi.

Tanqidga erk bermang!

Tanqid ham me`yorida bo`lishi kerak. Hech birimiz, hatto eng katta tashkilot rahbari ham kamchiligu nuqsonlardan holi emas. Agar o`zingizni allaqachon bo`lib o`tgan noxush voqea uchun tanqid qilayotgan bo`lsangiz, yaxshisi, buni hammaga aytavermang, bir parcha qog`ozga yozing. Xatolaringizni bosqichma-bosqich bayon etib, uni kelgusida qanday tuzatmoqchi ekaningizni qayd qilib boring va yozganlaringizga imkon qadar amal qiling!



Kichik test

O`z-o`zini rag`batlantirish odamni ilhomlantirib, ko`p ishlarga qodir bo`lishini ta`minlaydi. Eng muhimi, bu bilan kamchiliklardan xalos bo`lish ham mumkin. Deylik, biror ishni bajarib bo`ldingiz (o`quv kursini tugatgach, ishda biror loyihani yakunlagach). Xo`sh, o`zingizni qanday rag`batlantirgan bo`lardingiz?

Qanchalar iqtidorliman! Qoyil!
Agar chindan xohlasam, barini eplay olaman.
Xudoga shukr, uddaladim!
Bu qo`limdan keldi!
Yangi ish boshlash kerak.
Va nihoyat hammasi tugadi!
Mana, tugatdim ham, biror kamchiligi bo`lsa-chi?
Bajardim, lekin buni hech kim sezmadi.
Kimgayam kerak edi, bularning hammasi?
1-2-variantlar: Siz har bir yutug`ingizni bayram qila olasiz. Omadsizlik oldida bosh egmaysiz. Bu kayfiyat o`zingizga bo`lgan ishonchni saqlab qolishga yordam beradi.

3-4-5-6-variantlar: O`z kuchingizga to`laqonli ishonmaysiz. Doim o`zgalardan maqtov kutib yashaysiz. Lekin payti kelganida buni inkor etasiz, go`yoki, rag`batga arziydigan ish qilmagandek tutasiz, o`zingizni. Bunday ichki ziddiyatni yo`q qilish uchun o`zingizni ovoz chiqarib maqtang va rag`batlantiring. Shunda yangi ish boshlash oson bo`ladi.

7-8-9-variantlar: Siz o`zingizdan juda ko`p narsa talab qilasiz va imkoniyatlaringizni aniq baholay olmaysiz. Balki qoniqish hissini uyg`otmaydigan ishlardan avvalboshdanoq voz kechgan ma`quldir? Undan ko`ra, ko`pchilikka foyda keltiradigan, qiziqarli ishlarga vaqt va kuch sarflang.



Fikringizni dadil ifodalang!

Jamoaga qattiq qarshilik ko`rsatib emas, murosa yo`li bilan taklif bildirishni o`rganing. Fikringizni asosli dalillar bilan ifodalang. Ba`zan ichki xohishingiz boshqacha ekanini bildirib turing. Hammaga yoqqan kino sizga yoqmasa, aybdor emassiz. Unutmang, umumiy fikrlar ichida individual yondashuvga ega bo`lishga haqlisiz.



O`zingizni qadrlang!

O`zingizni yaxshi ko`ring, hurmat qila biling. Shunda o`zgalar ham sizni qadrlashadi. O`zingizdan vafodorroq, ichki olami o`zingizdan ko`ra go`zalroq va hokisor odam bormi yana? Yo`q, albatta. Bu siz — dunyodagi etti milliard odam orasidagi yagona va betakror INSON!
Категория: Salomatlik va Kasalliklar | Просмотров: 295 | Добавил: ADMIN | Теги: Ayol | Рейтинг: 5.0/1
Всего комментариев: 0
avatar
Реклама
Новости
Саундтреки
CHAQMOQ.COM © 2016-2017Конструктор сайтов - uCoz | Statok.net waplog