Меню Сайта
Онлайн Мини Чат
Статистика сайта
Онлайн всего: 111
Гостей: 109
Пользователей: 2
dodauzb98, Mohira
Фотогалерея
Главная » 2016 » Dekabr » 6 » Test orqali didingizga baho bering!
22:39
Test orqali didingizga baho bering!
«Ko`chaga yasanib chiqqaningda ortingdan mingta erkak qayrilib qarasa xursand bo`lma, senga hasad ko`zi bilan qarayotgan birgina ayolni ko`rsang, quvonishing mumkin. Demak, sen bugun juda go`zalsan!» Noma`lum muallif

Biz hammadan go`zal, chiroyli va betakror bo`lishni istaymiz. Buning uchun ko`zgu qarshisida soatlab vaqtimizni o`tkazamiz, noqulay bo`lsa-da, tor ko`ylak va baland poshnali tufli kiyamiz. Ammo did-farosat bo`lmasa, bu harakatlarning barchasi besamar ketadi. Xo`sh, didimiz qay darajada?! Quyidagi test buni aniqlab beradi!

1. Libos sotib olishda siz uchun muhim bo`lgan asosiy talab qaysi?

A. «Albatta, narxi. Arzon bo`lsa, yaxshi-da!»

B. «Sifatiga ahamiyat beraman».

V. «Men brend liboslarni kiyishga odatlanganman. Shuning uchun ishlab chiqargan korxonasi bilan qiziqaman».

2. Egningizdagi libosni tanqid qilishdi deylik, sizning harakatingiz...

A. «Mening kiyimim bilan odamlarning nima ishi bor?! Borimni kiyaman-da! Axir men ularning libosiga umuman qaramayman-ku?!»

B. «Tanqid kim tomonidan aytilganiga e`tibor beraman. Balki bejizga gapirishmagandir...»

V. «Meni hech kim tanqid qilmaydi, bunga ishonaman!»

3. Imidjingizni tubdan o`zgartirish qo`lingizdan keladimi?

A. «Bundan ham muhimroq muammolar bor, shekilli...»

B. «Qiziqishim ustunlik qilib bu ishga qo`l urishim mumkin».

V. «Voy, unda shuncha bir-biridan chiroyli kiyimlarim nima bo`ladi?»

4. Ko`chaga chiqishdan avval kiyimlaringizni qachon tayyorlaysiz?

A. «Ertalab javondan birorta libosni olib kiyaveraman».

B. «Uyquga yotishdan avval ertaga qaysi kiyimni kiyishimni rejalashtiraman».

V. «Kechki ovqatdan so`ng ertangi libosimni kiyib ko`rib, unga qo`shimcha aksessuarlarni ham tayyorlayman».

5. Bugun kiygan libosingizni ertaga ham kiya olasizmi?

A. «Ertaga ham, indinga ham kiyaveraman, buning nimasi yomon?»

B. «Yo`q, imkon qadar bu ishni qilmaslikka harakat qilaman».

V. «Bugun kiygan libosimni endi kamida bir hafta kiymasligim aniq!»

6. Sizga yaqin bo`lgan libos to`plamini tanlang.

A. «Futbolka, jinsi shim, sport poyabzali va katta sumka».

B. «Kardigan, kofta, qulay shim, past poshnali tufli va o`rtacha kattalikdagi sumka».

V. «Yoqali kofta, qalamcha shaklidagi yubka, baland poshnali tufli va charm sumka».

7. Pardoz san`atini to`liq egallaganman deb hisoblaysizmi?

A. «Pudra va pomada surtishni san`at deysizmi?»
B. «Moda jurnallari hamda o`zimga yoqqan mashhur ayollarning suratlariga qarab, pardoz qilishni o`zim o`rganganman».
V. «Soch turmaklash va pardoz bo`yicha o`zim uchun mashhulotlarga qatnaganman».

8. Qaysi turdagi poyabzal siz uchun eng ma`quli?

A. «Faqat poshnasi past bo`lsa bo`ldi».
B. «Aniq birini aytolmayman, qulay bo`lgani yaxshi».
V. «Yashasin baland poshnali tuflilar!»

9. Boshdan-oyoq qip-qizil rangda kiyinib olgan ayol ro`parangizda o`tib ketdi. Siz nima haqida o`yladingiz?

A. «Yarashibdi, qandini ursin!»
B. «Me`yordan ozgina oshirvormaganmi?!»
V. «Shu qadar ham didsiz bo`ladimi ayol kishi?!»

10. Tikuvchiga buyurtma asosida libos tiktirish...

A. «Azobning o`zginasi! Undan ko`ra bozorga tushib, tayyor kiyim olib chiqqan yaxshi emasmi?»
B. «O`zingga o`zing dizaynerlik qilish imkoniyatini beradigan jarayon».
V. «Juda zo`r! Kimdir menikidek libos kiymaganmikan, degan o`y sizni aniq bezovta qilmaydi. Tiktirilgan libos faqat sizdagina bo`ladi!»

11. Sizningcha, betakror ko`rinish uchun nima qilish lozim?

A. «Sochlarni ikki kunda bir yuvish va orasta kiyinish».
B. «Avvalo inson o`zligini yo`qotmasligi lozim».
V. «Yorqin pardoz va chiroyli libos har qaysi ayolni ham betakror ko`rinishga keltira oladi».

12. Uyda qanday ko`rinishda yurasiz?

A. «Ko`chaga kiyib bo`lmay qolgan liboslarimni kiyib yuraman».
B. «Qulay libosni kiyib olaman, lekin pardoz qilishni unutmayman».
V. «Uyda ham chiroyli ko`rinishda bo`lishga harakat qilaman. Muntazam uy uchun alohida liboslar xarid qilaman».

Yo`riqnoma

O`zingizga ma`qul kelgan javoblarni belgilab olgach, ballingizni hisoblab chiqing. Buning uchun har bir «A» javobi uchun 1, «B» javobi uchun 2, «V» javobi uchun esa 3 balldan qo`shing. Ballingiz miqdorini aniqlab bo`ldingizmi? Marhamat, endi sizga berilgan ta`rif bilan tanishing!

Test natijasi:

12 balldan 19 ballgacha

Judayam soddasiz. Libosni shunchaki inson tanasini berkitib turuvchi vosita deya sanaysiz. U ayolga ko`rk bag`ishlashi haqida o`ylashni ham istamaysiz. Sizning nazaringizda, go`zallik salonlari, kiyim-kechak do`konlari hashamni xush ko`ruvchilarning makoni. Hayotda murakkab masalalar qalashib yotganda odamlarning yuragiga yasan-tusan qanday sihishiga aqlingiz lol. Ammo kishining libosi u haqida ilk taassurotni berishini unutib qo`ymang. Qalbi go`zal insonning tashqi ko`rinishi ham xuddi shunday bo`lishi lozim!

20 balldan 29 ballgacha

Boriga shukr qiladigan ayolsiz. Did-farosatingizga havas qilsa arziydi, har bir narsada me`yorga amal qilasiz. Har bir ayol singari yangi libosingiz bo`lishini istaysiz, ammo mavjud kiyimlaringizni ham yarashtirib kiyib yurish qo`lingizdan keladi. Avvalo, orastalikka e`tibor qaratishingiz tahsinga sazovor. Ba`zi-ba`zida o`zingizni erkalatib turishni maslahat beramiz.

30 balldan yuqori

Kiyinish va pardoz-andoz borasida zamondan ortda qolishni istamaysiz. Moda olamini muntazam kuzatasiz. Uning qonun-qoidalariga asosan kiyinasiz. Har bir mavsumni do`konga borish bilan boshlaysiz. Javoningiz to`la bo`lsa ham, egningizga kiyishga kiyim topolmagan vaqtlaringiz ko`p bo`ladi. Sizning yurish-turishingizga ko`pchilik havas bilan qaraydi. Ammo bundan o`zingiz zavq olyapsizmi? Haddan oshirib yubormadingizmikan? Qimmatbaho liboslar ayolning didi yuqori ekanligidan dalolat bermaydi. Shu haqida o`ylab ko`ring.
Категория: Foydali maslaxatlar | Просмотров: 1277 | Добавил: ADMIN | Теги: Ayol, gozallik | Рейтинг: 0.0/0
Всего комментариев: 0
avatar
Реклама
Новости
Саундтреки
CHAQMOQ.COM © 2016-2017Конструктор сайтов - uCoz | Statok.net waplog